„Зборувавме за борбата против корупцијата и европскиот пат“.
Ова беше објаснувањето на Арбен Таравари, лидер на Алијансата за Албанците, за средбата со премиерот Димитар Ковачевски. Според Таравари, се зборувало за прашања поврзани со функционирањето на државата и системот.
„Немаме официјални преговори. Ако почнеме, нема да криеме. Не добивме покана“, изјави Таравари.
Тој смета дека партијата со која раководи е сериозна.
„Ако има преговори, на крајот членството ќе утврди дали ќе влеземе во Владата“, додаде Таравари.
Тој додаде дека ќе има услови.
„Ќе имаме црвени линии неопходни за влез во Владата. Имаме пакет-мерки кои ќе бидеатуслов за влез во Владата“, посочи тој.
Според него, ВМРО има лош „вординг“, односно станувала понационалистичка партија и од Левицата.
„Ние имаме комуникација со сите партии. Имаме и коалиција со ВМРО-ДПМНЕ. ‘Вордингот’ на ВМРО не ни се допаѓа, ги намалуваат капацитетите за соработка со албанските партии. ВМРО се натпреварува со Левицата, која е понационалистичка партија, што не е добро“, додаде Таравари.
Нему не му се допаѓа ниту работата на Владата СДСМ-ДУИ.
„Ќе продолжиме да критикуваме“, посочи Таравари.
