Јавен обвинител од Основното јавно обвинителство Скопје поведе постапка против 67-годишно лице за кое постои основано сомнение дека сторило кривично дело – насилство.
„Пријавениот, на 14 ноември, со грубо навредување и грубо насилство ја загрозил сигурноста на снимател од новинарска екипа, додека кај присутните сведоци – новинар и возач на телевизиската екипа предизвикал чувство на несигурност, загрозување и страв. Осомничениот најпрвин упатил погрдни зборови и пцовки кон новинарската екипа која снимала прилог, а потоа и физички го нападнал снимателот, удирајќи го со лактот во вилицата и нанесувајќи му телесна повреда – набиеница“, информираат од Обвинителството.
Бидејќи постојат околности кои упатуваат на опасност осомничениот да се даде во бегство, како и особени околности врзани со начинот на извршување на делото кои укажуваат дека тој би можел да го повтори делото, надлежниот јавен обвинител до судијата на претходна постапка достави предлог за определување мерка – куќен притвор.
Вчера, напаѓачот на новинарската екипа на ТВ 24 беше приведен, по пријава од снимателот Љубиша Игнатов, кого физички го нападна со боксови во скопската населба Пржино. Снимателот со новинарска екипа бил на терен пред куќата која била пријавена како престојувалиште на украинскиот бизнисмен Олександр Онишченко, за кој неодамна се дозна дека добил македонски пасош. Напаѓачот е сопственик на таа куќата.
Случајот предизвика бројни реакции и осуда од страна на новинарските друженија и институциите.
