Кинескиот претседател Шји Џинпинг ќе се сретне со американскиот колега Џо Бајден на самитот на Г-20 во Индонезија и на самитот на АПЕК во Тајланд следната недела, соопшти денеска кинеското Министерство за надворешни работи.
Белата куќа вчера потврди дека двајцата лидери ќе се сретнат на самитот на Г20. Како што е наведено, Бајден и Шји ќе се сретнат на 14 ноември. Тоа ќе биде нивна прва средба лице в лице откако Бајден стана претседател.
Двајцата лидери ќе разговараат за напорите за одржување и продлабочување на линиите на комуникација меѓу САД и Кина, одговорното управување со конкуренцијата и заедничката работа на полињата каде што има усогласени интереси, се вели во соопштението.
Тие особено ќе разговараат за работата на транснационалните предизвици кои ја засегаат меѓународната заедница, соопшти Белата куќа.
„ За време на самитот, Шји Џинпинг ќе оствари билатерални средби со францускиот претседател Макрон, американскиот претседател Бајден, сенегалскиот претседател Меки Сал и аргентинскиот претседател Алберто Фернандез, изјави за новинарите во Пекинг портпаролката на кинеското Министерство за надворешни работи, Хуа Чунјинг.
Индонезија ќе претседава со овогодинешниот самит на Г-20, но подготовките за самитот на островот Бали од 15 до 16 ноември се во сенка на војната во Украина, глобалната криза со храна и енергија како резултат на тој конфликт и тешките меѓународни санкции наметнати на Москва.
