Ќе се извинат ли МВР и Спасовски што направија јавен линч врз млад човек чиј идентитет го објавија и го прогласија за бомбаш, прашува опозициската ВМРО-ДПМНЕ.
„Ќе поднесе ли оставка Спасовски што направи жигосување на млад живот? Ќе поднесе ли некој воопшто одговорност што МВР е толку неспособно. па не може да открие кој во континуитет праќа лажни дојави за бомби?“, велат од партијата.
Претходно вчера, полицијата приведе 23-годишно момче поради поврзаност со дојавите за бомбите во училиштата во Скопје. По десет часа распит, тој беше ослободен.
Приведениот е член и активист на платформата „Конзерватива.мк“, која синоќа на „Фејсбук“ објави дека тој не е поврзан со дојавите за бомби во училиштата.
„Неспособноста на МВР и властите резултира со приведување невини лица! Одговорно тврдиме и демантираме дека нашиот член Никола нема никаква поврзаност со овие настани“, објави „Конзерватива.мк“.
Вчера, лажни дојави за бомби имаше во девет скопски училишта, а минатата недела три последователни дена исто така девет училишта добиваа имејлови на електронските адреси со дојави за бомби.
