Хари Стајлс за првпат е прогласен за најбогата британска славна личност на возраст од 30 и помалку, според Heat Rich List.
28-годишниот пејач, текстописец и актер го имаше своето деби на годишната листа на магазинот во 2016 година, а сега ја проби бариерата од 100 милиони фунти, со тоа што натрупа богатство од 116 милиони фунти и го надмина 31-годишниот Ед Ширан на врвот.
Зголеменото богатство на Хари доаѓа поради успехот на неговиот трет соло албум Harry’s House, кој помина шест недели на врвот на топлистите во Обединетото Кралство, како и водечкиот сингл As It Was кој беше на врвот на американската „Билборд“ листа 15 недели.
Актерската кариера на поранешната ѕвезда од One Direction продолжува да напредува со главните улоги во „Не грижи се, драга“ (2022) и „Мојот полицаец“, а исто така има и профитабилни договори за поддршка со „Гучи“ и линијата за нега на кожа и лакови за нокти.
