Командант на копнените сили на Украина, генералот Олександр Сирски, во интервју за „ABC News“ изјави дека светот треба да биде загрижен поради заканата на рускиот претседател Владимир Путин да користи нуклеарно оружје.
На крајот на минатиот месец Путин се закани дека Русија ќе прибегне кон употреба на нуклеарно оружје во војната против Украина, по серијата неуспеси на Москва на бојното поле, пишува медиумот.
„Ние сме и треба да бидеме загрижени. Во моментов мислам дека победуваме и покрај предизвиците на војната. Прво, Украинците ја добиваат психолошката битка. Имаме успех на бојното поле, но војната е тешка“, изјави командантот за „ABC News“.
„Немало војни од такви размери во Европа, ниту никаде во светот, од Втората светска војна. И ние разбираме дека оваа војна е за опстанок на нашиот народ и нашата земја и затоа мора да победиме“, вели Сирски.
