Папата Франциск денеска изјави дека одбивањето на мигрантите е скандалозно, одвратно и грешно.
– Отфрлањето на мигрантите е скандалозно. Навистина, тоа е злосторство и поради тоа умираат пред наши очи – рече папата на плоштадот Свети Петар во Ватикан, а пренесе Ројтерс.
Папата рече дека Средоземното Море е најголемото гробиште во светот, мислејќи на илјадниците мигранти кои се удавија обидувајќи се да стигнат до Европа.
– Одбивањето на мигрантите е одвратно, тоа е грев. Злосторство е да не се отвори вратата за оние на кои им е потребна помош – рече тој.
Тој изјави дека некои мигранти, кои биле вратени од границата, „биле сместени во концентрациони логори каде што биле експлоатирани и третирани како робови“.
Поглаварот на Римокатоличката црква денеска го прогласи за свет бискупот Џовани Батиста Скалабрини, познат како „таткото на мигрантите“ и болничарот Артемис Зати кој им помагаше на болните во Аргентина,пренесуваат медиумите.
