Тргнаа првите два воза од Севастопол и Симферопол по експлозијата на Кримскиот мост, објави на Телеграм руската железничка компанија Гран експрес.
Компанијата соопшти дека возот за Москва тргнал од Симферопол, а за Санкт Петербург тргнал од Севастопол, пренесе ТАСС.
Сообраќајот за автомобили и автобуси претходно беше обновен преку мостот на Крим, кој утринава беше оштетен во експлозијата, објави лидерот на Крим, Сергеј Аксјонов.
„ Во моментов сообраќајот е отворен за автомобили и автобуси, со максимални проверки“ – напиша Аксјонов на Телеграм, пренесува Интерфакс.
Аксјонов рече дека траектот „Керч-2“ ќе почне да работи за камиони.
Во експлозија на камион на мостот на Крим загинаа три лица, соопшти Истражниот комитет на Русија.
Претходно Националниот комитет за борба против тероризмот објави дека на Кримскиот мост експлодирал камион, а седум вагони со цистерни се запалиле во воз што минувал преку мостот.
