Украинскиот претседател Володимир Зеленски синоќа изјави дека продолжува работата на ексхумацијата на телата во Изjум, во областа Харков, кои биле пронајдени на местото на масовна гробница, како што тврди Киев.
Тој додаде дека се вршат испитувања на телата и дека се пронајдени нови докази за тортурата на закопаните таму.
„ Во ослободените области на Харков, во различни градови и населени места веќе се пронајдени повеќе од 10 места за мачење. Додека окупаторите бегале, ги фрлиле и апаратите за мачење. Дури и на обичната железничка станица во Козача Лопан пронајдена е просторија за мачење и алат за електротортура“ – рече Зеленски во видео обраќањето.
Тој посочи дека „мачењето било широко распространета практика на окупираната територија“.
„ Тоа го направија нацистите. Ова го прават Русите. И ќе одговараат на ист начин – и на боиште и во судници. Ќе ги идентификуваме сите оние кои мачеа, понижуваа, кои го донесоа ова злосторство од Русија овде, во нашата украинска земја“ рече тој.