Кинескиот лидер Шји Џинпинг и рускиот претседател Владимир Путин на нивниот состанок утре ќе разговараат за конфликтот во Украина и за други „меѓународни и регионални прашања“, соопшти Кремљ.
Двајцата лидери ќе се сретнат во Узбекистан на самит кој ќе покаже „алтернатива“ на западниот свет, додава Кремљ.
Џинпинг заминува на своето прво патување во странство од почетокот на пандемијата, јавува Би-Би-Си.
Кинескиот претседател денеска ја започнува својата тридневна посета на Казахстан. Утре ќе се сретне со Путин на самитот на Шангајската организација за соработка во Самарканд, кој ќе се одржи на 15 и 16 септември.
„ На самитот Путин ќе се сретне и со други лидери, вклучително и со оние од Индија, Пакистан, Турција и Иран, но неговата средба со кинескиот лидер е од особено значење“ – изјави портпаролот на Министерството за надворешни работи на Русија, Јуриј Ушаков.
Тој рече дека самитот се одржува „во позадината на големите политички промени“.
Шангајската организација за соработка е основана во 2001 година со четири поранешни советски држави од Централна Азија, а Кина и Русија долго време се обидуваат да ја позиционираат како алтернатива на западните мултилатерални групи.
