Буџетот за трошење на Барселона се зголеми за речиси 800 милиони евра, откако „мајсторскиот“ план на претседателот на клубот, Жоан Лапорта со економската трансформација, очигледно успеа.
Шпанската Ла лига ги откри граничните суми кои 20-те клуба можат да ги потрошат во сезонта 2022/23, а по серијатa продажби на економските и ТВ правата на клубот, Барса веќе не е ограничена. Минатото лето „селери-капот“ на каталонскиот клуб беше негативни 144 милиони евра, а сега е на високи 656 милиони евра, со што се само зад Реал Мадрид на листата на Ла лига.
Лапорта во текот на летото продаде 25 отсто од ТВ-правата на клубот во следните 25 години, како и голем дел од компанијата „Барса студиос“, одговорна за продажба на опрема со логото на клубот. Покрај ова, во клубот пристигнаа и голем број на засилувања, како Роберт Левандовски, Рафиња, Жил Кунде, Андреас Кристенсен, Франк Кеси, како и последните пристигнувања Ектор Белјерин и Маркос Алонсо.
