Мисијата на Меѓународната агенција за атомска енергија (МААЕ) во нуклеарната централа Запорожје сепак би можела да одигра важна улога, и покрај тешкотиите предизвикани од руското воено присуство во централата, изјави денеска украинскиот претседател Володимир Зеленски.
„За жал, не ја слушнавме главната работа од МААЕ, а тоа е поканата до Русија да ја демилитаризира нуклеарната централа. Се надевам дека мисијата ќе го испочитува она што го договоривме и дека ќе им служи на интересите на целата меѓународна заедница“ – рече Зеленски, пренесе Ројтерс.
Тој изјави дека украинските власти направиле се за да обезбедат пристапот на МААЕ до електраната во Запорожје и оти верува дека оваа мисија „сеуште може да игра улога“.
Украинската државна нуклеарна компанија Енергоатом претходно денеска соопшти дека на мисијата на МААЕ не и било дозволено да влезе во кризниот центар на централата, каде што Украина тврди дека се стационирани руски војници и дека ќе се бори за непристрасна проценка на ситуацијата.
Зеленски, исто така, рече дека овозможувањето безбедно функционирање на електраната во Запорожје и нејзиното останување на украинската електрична мрежа ќе му помогне на Киев да дејствува во борбата против енергетската криза во Европа.
-Украина е подготвена да го зголеми извозот на електрична енергија во земјите на ЕУ – објави украинскиот претседател во видео емитувано на состанокот на форумот Амброзети во Европската куќа на северот на Италија, пренесува британската агенција.
