Тајван го отфрла моделот „една земја, два системи“ што Пекинг го претстави во својата стратегија за решавање на тајванското прашање, соопшти денеска тајванското Министерство за надворешни работи.
„Само народот на Тајван може да одлучи за својата иднина“, изјави портпаролката на министерството Џоан Оу на прес-конференција во Тајпеј, пренесува Ројтерс.
Таа додаде дека Кина ја користи неодамнешната посета на претседателката на Претставничкиот дом Ненси Пелоси како изговор да создаде нова нормала за да го заплаши народот на Тајван.
Вчера Кина објави Бела книга со наслов „Прашањето на Тајван и повторното обединување на Кина во новата ера“, во која се вели дека мирното обединување и „една земја, два системи“ се основните принципи за решавање на проблемот со Тајван.
Пекинг, исто така, наведува дека нема да се откаже од употребата на сила и дека ја задржува можноста да ги преземе сите неопходни мерки за заштита од надворешно мешање и сите сепаратистички активности.