Ребалансот на Буџетот за 2022 година е потврда на дело на заложбата на Владата и парламентарното мнозинство предводени од СДСМ за стабилна економија и повисок животен стандард на граѓаните. Со ребалансот обезбедивме средства за повисоки плати и пензии, за поголема поддршка на земјоделците, но и за антикризни мерки за помош на граѓаните и компаниите, изјави на денешната прес-конференција, Мартин Костовски, пратеник на СДСМ.
Тој додаде дека обезбедени се средства од над 76 милиони евра за антикризни мерки за справување со последиците од економската и енергетска криза. 52 милиони евра издвојуваме за поддршка на земјоделците за да поттикнеме зголемување на домашното земјоделско производство.
Средства се обезбедени за рекорден раст на пензиите, за зголемување на платите во образованието и детската заштита но и за субвенционирање повисоки плати во приватниот сектор.
Костовски наведе дека со овој ребаланс кој е поздравен и од Светската банка не се запоставени ниту капиталните проекти кои се важни за економскиот раст. Ова е уште една алатка за обезбедување на макроекономската стабилност и конкретна поддршка за стопанството.
Продолжуваме со реализација на мерки и политики кои имаат за цел заштита на животниот стандард на граѓаните и полесно справување со последиците од глобалната економска и енергетска криза, изјави Костовски.
