Ковачевски и Османи да не го кријат протоколот, тој значи бугаризација на државата, народот е против тоа, велат од ВМРО-ДПМНЕ.
„Владата прво кажа дека ќе го објави, а сега веќе втора недела не го објавува протоколот. Предлогот кој власта сака да го помине низ Собрание е на штета на македонските национални интереси. Секој ден десетици илјади луѓе кажуваат не за бугаризација и асимилација. Академската заедница, новинарите, колумнистите, сите се гласни и јасни дека предлогот кој владата сака да го турка во Собрание ги негира македонскиот јазик и идентитет“, се истакнува во соопштението од опозициската партија.
Со предлогот, појаснуваат од таму и се дава право на Бугарија и да ги пишува учебниците по историја во Македонија и да ја блокира земјата на патот кон ЕУ, ако нешто не и се допаѓа.
„Владата не води грижа за македонските интереси, тие само сакаат да добијат сликање во Брисел, и да ја остават Македонија потоа со еден тон проблеми. Власта не смее да го игнорира народот. Предлогот мора да го отфрли, и да не се користат пратениците од мнозинството да гласаат нешто што е на штета на Македонија“, потенцираат од ВМРО-ДПМНЕ.