Во Германија половните автомобили поскапеа за речиси една третина во рок од една година, според Агенцијата за анализа на пазарот ДАТ.
„Во април, вообичаениот автомобил стар три години со бензински мотор беше за 30,1 отсто поскап од слични автомобили во април минатата година“, покажува анализата. Во просек, автомобил стар три години со бензински мотор чинел 27.900 евра.
Автомобилите со дизел мотори поскапеа уште повеќе, за 31,8 отсто, а за тригодишни „дизели“ во просек требало да се издвојат 28.960 евра.
Според аналитичарите, цените на половните автомобили растат поради намалената понуда на нови. Кризата со корона влијаеше на недостигот на чипови и други делови за автомобилската индустрија, што ги намали капацитетите.
Истовремено, цените на новите автомобили пораснаа за седум отсто во последните три години. Значителниот пораст на цените на половните автомобили не се однесува само на автомобилите до три години, туку и на постарите модели.
„Кога понудата е ограничена, побарувачката за постари модели расте, а тоа секако ја зголемува цената“, изјави портпаролот на агенцијата ДАТ.
Дебатата што се одржа во Германија во пресрет на кризата со корона, која предвидуваше дури и делумна забрана за дизел автомобили, веќе не влијае на намалената побарувачка за овие возила, што беше забележливо среде таа дебата.
Според податоците на ДАТ, но и најголемиот интернет-портал за половни автомобили „mobile.de“, има побарувачка за половни „дизели“, особено за оние со појаки мотори.