Украинскиот суд осуди двајца заробени руски војници на 11 и пол години затвор за гранатирање град во источна Украина, што е втора пресуда за воени злосторства од почетокот на руската инвазија во февруари.
Александар Бобикин и Александар Иванов, кои ја слушнаа пресудата зад стаклeн параван во Окружниот суд Котелевска во централна Украина, се изјаснија за виновни минатата недела.
„Вината на Бобикин и Иванов е целосно докажана“, рече судијата Евген Болибок.
И двајцата минатата недела признаа дека биле дел од артилериска единица која гаѓала цели во провинцијата Харков од руската провинција Белгород. Гранатирањето уништило образовна институција во градот Дергачи, но не резултирало со човечки жртви, соопштија обвинителите.
Бобикин и Иванов, опишани како возач и стрелец, биле фатени откако ја преминале границата и продолжиле да гранатираат. Обвинителите побараа од судот 12-годишна затворска казна за нив, додека одбраната побара попустливост, велејќи дека двајцата војници извршувале наредба и се покајале за стореното.