Канада објави закон кој подразбира „национално замрзнување“ на продажбата и купувањето пиштоли и револвери, како дел од пакетот за контрола на оружјето во оваа земја.
Новиот канадски закон, доаѓа само една недела откако вооружен напаѓач уби 19 деца и двајца учители во нивната училница во американската сојузна држава Тексас.
Премиерот Џастин Трудо им рече на новинарите дека се потребни нови регулативи додека насилството се зголемува.
„ Доволно е само да погледнеме јужно од нашата граница, да знаеме дека ако не преземеме акција силно и брзо, ќе биде се полошо и полошо и ќе ни биде потешко да се спротивставиме“, нагласи Трудо.
Најавеното „замрзнување“ на набавката на оружје вклучува исклучоци, кои ги вклучуваат спортските стрелци, олимписките спортисти и членовите на обезбедувањето, а на Канаѓаните кои веќе поседуваат пиштоли ќе им биде дозволено да го задржат.
Властите не очекуваат зголемена понуда на оружје во пресрет на „замрзнувањето“, делумно затоа што тоа е веќе строго регулирано, изјави владин претставник на прес-конференција.
Канада има построг закон за оружје од САД, а стапката на убиства со огнено оружје е помала од една петтина од онаа на САД, но таа е повисока отколку во другите богати земји и расте, така што во 2020 година беше пет пати поголема отколку во Австралија.