Британски пратеник, кој е суспендиран од Конзервативната партија на премиерот Борис Џонсон по обвинувањата дека гледал порнографија на својот мобилен телефон во Долниот дом на парламентот, рече дека по грешка ја отворил експлицитната содржина.
Нил Париш беше суспендиран од партијата на конзервативците во петокот, откако тој самиот се пријавил кај комесарот за парламентарни стандарди. Но, изјави дека останува член на парламентот додека трае истрагата.
На прашањето на новинарите дали случајно отворил нешто на телефонот, Париш рече: „Да, но истрагата нека потврди“.
Британските медиуми објавија дека министерка рекла оти го видела колегата како гледа порнографски материјал додека седел покрај неа во Долниот дом и дека истиот пратеник гледал порнографија за време на состанок на комисија.
Во интервју за „Тајмс“ објавено денеска, сопругата на Париш, Сју, изјави дека не памети дека нејзиниот сопруг направил нешто силично претходно и дека тој е прекрасна личност.
„Сето тоа е многу срамно. Искрено, останав без здив. Пратеници не треба да гледаат порно филмови. Овие дами се апсолутно во право кога се лутат, исто како што сум лута и јас”, рекла Сју.