Министерката за труд и социјална политика, Јованка Тренчевска, денес оствари средба со Матео Мекачи, директор на Канцеларијата на ОБСЕ за демократски институции и човекови права (ОДИХР). На средбата се разговараше за досегашната соработка меѓу ОДИХР иминистерството, со акцент на политиките и активностите во областа на родовата еднаквост, недискриминацијата, унапредување на правата на лицата со попреченост, како и положбата, статусот и правата на Ромите, како ранлива категорија на граѓани.
Тренчевска ја истакна заложбата на Владата на Република Северна Македонија и Министерството за труд и социјална политика, во воспоставувањето на целосна родова еднаквост во општеството и во таа насока ја посочи подготовката на новиот Закон за родова еднаквост, кој се очекува да биде донесен до крајот на оваа година. Притоа, таа информираше и за новата Предлог стратегија за родова еднаквост 2021-2026, која е во собраниска процедура, а со нејзиното усвојување Северна Македонија се насочува кон интегрирање на родовата перспектива во политиките и сузбивање на стереотипите како што се, насилството кон жените, унапредување на положбата во јавниот и приватниот живот во сите сфери на општественото живеење.
„Со Законот за родова еднаквост, очекуваме подобрување на механизмите за родова еднаквост на национално и на локално ниво, како и ефикасно функционирање на Ресурсниот центар за креирање на политики и родово одговорно буџетирање, кој го отворивме на почетокот на овој месец. Министерството продолжува да работи на креирање политики и мерки за вработување кои ќе ја намалат неактивноста на жените на пазарот на трудот, вклучување на жените Ромки, нивна активација и вработување, како и поголема инклузија на лицата со попреченост“, рече Тренчевска.
Таа се осврна и на претходно донесените законски решенија, како Законот за спречување и заштита од дискриминација, кој усогласен со меѓународните стандарди и Законот за спречување и заштита од насилство врз жени и семејно насилство, целосно усогласен со Истанбулската конвенција. Исто така ја посочи работата на новиот закон за вработување на лица со попреченост, кој ќе придонесе за зајакнување на овие лица и нивно активно вклучување на пазарот на труд.
Директор на Канцеларијата на ОБСЕ, Матео Мекачи изрази уверување дека досегашната соработка со министерството ќе продолжи и во следниот период, особено во областа на родовите политики, лицата со попреченост и поддршката на лицата од ранливи категории на граѓани.
Министерката Тренчевска потенцираше дека поддршката и соработката со Мисијата на ОБСЕ за нашата држава е од големо значење, особено во делот на искуствата и експертизата која ја добиваме по многу прашања кои се во надлежност на Министерството за труд и социјална политика.
