Денеска на 20-ти март Денот на среќата, на задоволство на сите граѓани, информираме за убави вести, велат од ЗОО-Скопје.
Информираат дека по повеќе од 20 години во скопската Зоолошката градина се родија три лавчиња.
Градоначалничката на Град Скопје Данела Арсовска денеска беше на увид во живеалиштето на лавчињата.
„Ова е една од најубавите работи кои се случиле во Зоолошката градина во Скопје, лавчињата се одлично згрижени, а вработените во Зоолошката градина со професионалност и внимание се грижат за мајката и малите да се безбедни и да ги имаат сите услови во внатрешното живеалиште каде што се постојано набљудувани“ истакна Арсовска.
„Лавчињата се стари само неколку дена, а посетителите ќе имаат можност да ги видат кога ќе бидат доволно возрасни да можат самостојно да се движат низ надворешното живеалиште“, истакна директорот на Зоолошката градина – Скопје, Кристијан Стаменов.
Од Град Скопје известуваат дека сите љубители на животни и посетители на ЗОО – Скопје, во идниот период ќе имаат прилика да учествуваат во давањето имиња на трите лавчиња.
