Франција го подигна нивото на предупредување за опасност од појавата на птичји грип, откако овој вирус беше откриен кај живина на фарма на североисток од земјата, по дотагашните откриени случаи во соседна Белгија и Луксембург, објави Министерството за земјоделство.
Високо заразен вид на птичји грип, H5N8, беше откриен оваа недела меѓу патки, кокошки, мисирки и гулаби во едно домаќинство во регионот на Ардените, и целата живина беше заклана како мерка на претпазливост, се вели во соопштението на француското министерство.
„Здравствената состојба во врска со високо патогениот птичји грип е загрижувачка. Од 1 август, во Европа се откриени 25 случаи на диви птици и оние што се одгледуваат дома“ се додава од страна на министерството.
Два случаи на вирусот H5N8 беа пријавени минатата недела во Белгија – еден кај продавач на птици и еден во приватен дом – а другиот во домаќинство во Луксембург поврзано со трговец во Белгија, се вели во соопштението.
Последните случаи на птичји грип H5N8 ја натераа Франција да ја подигне проценката на ризик на „умерена“ од „занемарлива“, што значи дека живината во некои региони во земјата ќе мора да се чува во затворени простории, соопшти министерството.
Епидемијата на птичји грип може да ги поттикне земјите увознички, особено во Азија, да воведат трговски ограничувања за производите од месо од живина.
