Ерменија е подготвена да ги продолжи разговорите со Азербејџан за решавање на конфликтот во Нагорно-Карабах и очекува конкретни предлози од групата Минск на ОБСЕ, изјави ерменскиот премиер Никол Пашинјан на владиниот состанок денеска, пренесува ТАСС.
„Во однос на повикот од копретседавачите на групата Минск на ОБСЕ за обновување на разговорите за решавање на конфликтот во Нагорно-Карабах, би сакал да нагласам дека Ерменија е подготвена да учествува во разговорите и на високо и на највисоко ниво, но чекаме конкретни предлози “, вели Пашинјан.
Според ерменскиот премиер, надминување на непријателството може и треба да стане клучна компонента на регионалната агенда на Ерменија.
„Продлабочувањето и нормализирањето на односите меѓу соседните земји е важна насока на политиката на ерменската влада. За жал, некои сили се обидуваат погрешно да ги претстават намерите на Ерменија, тврдејќи дека Ерменија направила реформата на вооружените сили приоритет за да усвои агресивна политика во однос на соседните земји. Ерменските вооружени сили не се развиваат за агресија, туку за заштита од агресија “, додаде Пашинјан.
