Американскиот воен брод „Куртис Вилбур“, повторно помина низ Тајванскиот теснец, една недела откако Тајпеј пријави најголем упад досега на кинески воени авиони во воздушната зона на Тајван.
Седмата флота на американската морнарица објави дека уништувачот вооружен со водени ракети од класата „Али Берк“ во вторникот извршил рутински транзит низ Тајванскиот теснец, во согласност со меѓународното право, и дека овој потег покажува американска посветеност на слободен и отоврен Индо-Пацифик, пренесува „Ројтерс“.
Последната мисија се случи околу една недела откако Тајван објави дека 28 авиони на кинеската авијација, вклучително борци и бомбардери, влегле во зоната за идентификација на ПВО на Тајван.
Инцидентот се случи откако лидерите на Г7 објавија заедничко соопштение во кое ја критикуваа Кина за голем број прашања и ја нагласија важноста на мирот и стабилноста преку Тајванското Море.
Пекинг наведува дека неговите активности околу Тајван се насочени кон заштита на суверенитетот на Кина и спречување на странските сили, додека тајванската влада ги осудува ваквите потези како обиди за заплашување.
Кина денес објави дека САД претставуваат најголеми безбедносни ризици во регионот на Пацификот. Источната команда на Кинеската народноослободителна армија објави дека нејзините сили го следеле американскиот брод за време на неговиот премин и дека тие го предупредиле.
