Граѓаните, фирмите, навистина имаат сериозен проблем и ние како Собрание имаме обврска, час поскоро да им излеземе во пресрет во оваа светска здравствена и економска криза, порача координаторот на пратеничката група на СДСМ Јован Митрески, од собраниска говорница.
„Три дена опозицијата покажува наводна загриженост, а денеска овде во Собранието покажува дека поважни им се пратеничките прашања, отколку помошта за граѓаните. Денеска, кога има пратенички прашања пратениците на ВМРО-ДПМНЕ велат да не се одржи седница на која ќе се донесат овие закони, за што поскоро да им помогнеме на граѓаните и на компаниите“ посочи Митрески.
Тој истакна дека ВМРО-ДПМНЕ се однесувала деструктивно и кога се носеше Буџетот за 2021 година и правела се тој да не биде донесен, а државата да мора да функционира преку времено финансирање.
Митрески посочи дека парламентарното мнозинство е стабилно и дека тоа се докажало и со гласањето на доверба на Владата.
