Министерот за здравство, Венко Филипче, денес ќе го разреши гинекологот Мухамед Асани од функцијата директор на Општата болница Струга кому Државниот санитарен и здравствен инспекторат дома му откри дива ординација, откако родилка од Дебар го обвини за лекарска грешка оти по породување со царски рез си замина без бубрег, јајчник и матка..
„Директорот ќе се разреши, а во текот на денов или утре ќе биде назначен нов директор“, рече министерот Филипче.
Тој извести дека за случајот на родилката од Дебар, на барање на семејството и на Хелсинчки комитет, формирал нова Комисија составена од директорите на Клиниките за гинекологија, урологија, КАРИЛ и директорката на Државниот санитарен и здравствен инспекторат. Тие треба уште еднаш да го анализираат случајот и да донесат нов заклучок, по оној на Комисијата од Лекарската комора која по стучниот надзор во Билницата во Струга не најде пропусти во оперирањето и лекувањето на родилката од Дебар.
