Грчката влада најави затворање на сите училишта во земјата и вклучување на уште три региони во црвената зона поради зголемувањето на бројот на новозаразени со коронавирусот и притисокот врз болниците.
Заменик министерот за цивилна заштита, Никос Хардалиас, најави построги ограничувања на јавното движење и полициски час за регионите на Халкидики на северот на Грција, Евријанија во централниот дел на земјата и источниот егејски остров Лезбос, пишуваат грчките медиуми.
Ограниченото движење ќе биде продолжено за уште најмалку 10 дена во регионот Атика.
Грчките здравствени власти посочуваат дека состојбата со епидемијата се влошува и покрај строгите мерки и проценуваат дека во Грција во моментов има околу 20.000 активни случаи на коронавирус, од кои половина се во Атина.
Во Грција дневно во просек се регистрираат околу 2.100 нови случаи на Ковид-19.
