Aлбанија ги исполнува условите за почеток на преговорите со ЕУ, а Македонија треба да најде решение за прашањето со Бугарија, порача еврокомесарот за проширување на Европската унија, Оливер Вархеји, од Економскиот форум што се одржува во Тирана.
„Комисијата смета дека за првата меѓувладина конференција со Албанија се исполнети сите услови, благодарение на важните реформи во изборниот закон, владеење на правото и во судскиот систем, вклучувајќи го и ветингот на судиите и обвинителите. Северна Македонија го одржува темпото на спроведување на ЕУ реформите, но важно е брзо да се најдат заеднички решенија за билатералните прашања меѓу Северна Македонија и Бугарија“, рече Вархеји.
На форумот се обрати и премиерот Зоран Заев кој порача дека ЕУ треба да ги исполни ветувањата за Западен Балкан. Заев го повтори ставот дека Владата никогаш нема да си дозволи да разговара за она за што не може да се разговара, а тоа е кои сме, кои се нашите идентитетски атрибути и која е генезата на нашата државност и јазик.
