Саудиска Арабија го демантира извештајот објавен од САД дека саудискиот принц Мохамед бин Салман го одобрил убиството на новинарот на Вашингтон пост, Џамал Кашоги.
„Кралството категорично го негира извештајот доставен до Конгресот (САД) за убиство на граѓанинот Џамал Кашоги“, се наведува во демантот.
Претходно, американската разузнавачка служба објави дека принцот Мохамед бин Салман ја одобрил операцијата за фаќање или убивање на Кашоги во Турција. Во извештајот се вели дека принцот сметал оти Кашоги претставува закана за кралството и затоа ги поддржува, доколку е потребно, насилните мерки само за да го замолчи.
Во извештајот се наведени и имињата на 21 лице блиски до принцот, кои биле вмешани.
Убиството се случи во октомври 2018 година во саудискиот конзулат во Истанбул. Кашоги тогаш влегол во зградата за да ги земе документите за венчавката што му претстоеше, а турските истражители соопштија дека тој таму бил задавен и убиен.
