Германија ќе воспостави контрола над пандемијата на коронавирус до крајот на годината, но нов, позаразен вид на ковид може да ја расипе ситуацијата, изјави Лотар Вилер, претседател на Институтот за инфективни болести „Роберт Кох“.
Досега Германија регистрираше 16 случаи на британскиот вид коронавирус и четири видови на јужноафриканскиот, додаде Вилер, објави „Ројтерс“.
Сите пациенти се заразиле по враќањето од странство.
„Ова нема да биде последната мутација што ќе ја видиме, да не го заборавиме и бразилскиот тип Ковид-19. Ќе имаме повеќе видови, затоа – не патувајте“, рече тој.
Во десет од 16 германски покраини речиси нема слободни кревети во болниците, а во единиците за интензивна нега, 85 отсто од креветите се зафатени.
Вилер апелираше до граѓаните да ја прифатат вакцината против коронавирус со цел да се намали притисокот врз болниците и рече дека луѓето треба да продолжат да се придржуваат кон социјалните растојанија и хигиенските правила.
„На крајот на 2021 година, ќе успееме да ја ставиме пандемијата под контрола“, рече тој.
