Министерот за здравство Венко Филипче на денешната собраниска седница за пратенички прашања кажа дека пред неколку месеци добил понуда од рускиот амбасадор во земјава, Сергеј Баздникин за руската вакцина „спутник 5“, но таа тогаш се уште била во фаза на клинички испитувања, а процесот, кој гарантира нејзина безбедност, не бил целосно завршен.
„Последните месеци тој процес заврши и таа влегува во еден од деловите на ‘Ковакс’ механизмот. Не како целосно одобрена. Меѓутоа, очигледно дека во официјалната група на сите производители преку ‘Ковакс’ ќе стигне и руската ‘Спутник ‘;. Значи, ние ќе можеме евентуално да ја добиеме и оваа вакцина со одлука на СЗО и на Гави алијансата“, изјави Филипче.
Тој потенцира дека не постоела ниту една можност да ја добиме руската вакцина во моментот кога првпат ни била понудена, оти не бил завршен процесот на клиничко испитување.
