Чешката биатлонска кралица Кукалова во жешка сесија за „Плејбој“

Чешката двократна светска шампионка во биатлон и огромна ѕвезда во својата татковина, Габриела Кукалова учествуваше во „жешка“ фотосесија за „Плејбој“, откако ја прифатила понудата од магазинот кога дознала дека поголем дел од парите ќе одат за добротворни цели.

Според Кукалова, нејзините фотографии се посветени како поддршка на луѓето кои имаат пореметувања во исхраната, објаснувајќи дека таа имала слични проблеми во животот.

„Понудата за ваква жешка фотосесија ме шокираше, но добротворниот дел ме натера да се согласам. Фотографиите нема да бидат видени само од читателите, туку ќе донесат и поддршка за луѓето со пореметувања во исхраната. Сакаме да собереме 250.000 чешки круни (10.000 евра) за мојата фондација“, вели Кукалова.

Кукалова е една од најуспешните чешки спортистки во историјата, освојувајќи го големиот кристален глобус (Светскиот куп) во 2016, освојувајќи две светски титули во мешана штафета (2015) и во спринт (2017). Таа ја пропушти Олимпијадата во 2018 поради здравствени проблеми, по што во 2019 се пензионираше.