Одборот за доделување на државната награда ,,22 Ноември“ ги прогласи добитниците на ова признание за 2020 година, кое се доделува на луѓе од политичкиот, културниот и општествениот живот кои дале свој придонес во унапредување на соживотот и меѓусебното разбирање меѓу припадниците на различните заедници, култури и вери во Македонија.
Годинава наградата ќе им биде врачена на албанологот, проф. д-р Џеват Лоши и книжевниот критичар, акад. Али Алиу.
Наградата на добитниците ќе им биде врачена на 22 ноември (недела) во 12 часот во Собранието на Република Северна Македонија.
22 ноември се одбележува како Ден на албанската азбука, бидејќи на тој датум во 1908 година албански интелектуалци од Балканот, на битолскиот конгрес ја унифицирале албанската азбука.
