Министерката за образование и наука Мила Царовска денес одржа работен состанок со претставници на Младинскиот образовен форум (МОФ).
Како што информираат од ресорното министерство, на состанокот било заклучено дека МОН ќе ја продолжи и ќе ја унапредува соработката со младинските организации во насока на подобрување на правата и политиките за младите.
Министерката Царовска истакнала дека соработката со младите и нивното активно и посветено учество во носењето одлуки и креирањето политики е неопходно за квалитетни реформи и процеси за унапредување на квалитетот на образованието, но и подобрување на целокупниот животен стандард на младите во нашата држава.
Претставниците на Младинскиот образовен форум на средбата посочиле дека продолжуваат да бидат партнер на институциите преку изработка на истражувања, анализи и предлози за квалитетни младински политики.
