Германската канцеларка Ангела Меркел, во видео порака денеска предупреди за влошената хуманитарна состојба низ целиот свет и нагласи дека пандемијата на коронавирус и глобалното затоплување веројатно ќе предизвикаат дополнителни вонредни состојби.
„Мора да имаме предвид дека пандемијата и климатските промени ќе ги променат околностите за многу луѓе ширум светот“, рече Меркел во своето обраќање.
Како земја, важно е брзо да ја мобилизираме хуманитарната помош, додаде таа.
Меркел ја наведе како пример операцијата на Бундесверот и работата на сојузната Агенција за техничка помош (THW) во Либан, по експлозијата на пристаништето во Бејрут во која загинаа 178 лица, а повредени се најмалку 6.000.
Експлозијата покажа како криза може да се развие ужасно брзо, посочи германската канцеларка.
Осврнувајќи се на Светскиот ден на хуманитарната помош – 19 август, Меркел ја истакна важноста од заштита на работниците кои пружаат помош.
