Делегација од Кабинетот на Претседателот на државата, Стево Пендаровски, денеска положи свежо цвеќе по повод 19-годишнината од загинувањето на осум армиски резервисти кај месноста Љуботенски бачила.
Цвеќиња беа положени пред спомен-обележјата во општина Ѓорче Петров, пред спомен-обележјето во село Љубанци, и во касарната „Илинден“ во Скопје.
Масакрот кај Љуботенски Бачила се случи на 10 август 2001 година во 8 часот наутро, откако воен камион на АРМ нагази на две противтенковски мини кај месноста Љуботенски Бачила, при што загина осум припадници на резервниот состав на АРМ. Покрај осуммината убиени, имаше и осуммина повредени.
Животите ги загубија бранителите Томе Бадаревски (33), Марјанчо Бошковски (28), Томе Димовски (37), Ивица Златевски (24), Бранко Јанев (36), Раде Јанковски (32), Томислав Настевски (27) и Гоце Чанкуловски (39), сите од Скопје.
