Убиецот на една од најпознатите планински горили во Угадна, Рафики, е осуден на 11 години затвор.
Феликс Бјамукама призна дека нелегално влегуол во заштитеното подрачје на националниот парк и ја убил горилата. На почетокот на судењето, тој тврдеше дека животното го нападнало и дека го убил Рафики во самоодбрана.
Бјамукама, исто така се изјасни за виновен за убиство на антилопи и диви свињи односно за поседување на месо од овие животни, пишува Би-би-си.
Истрагата откри дека Рафики бил убиен од остар предмет што ги прободел неговите внатрешни органи. Претставниците на националниот парк на 1 јуни забележале дека горилото го нема, а неговото тело било пронајдено еден ден подоцна.
Уште тројца мажи се во затвор и очекуваат судење.
Властите во Уганда кон средината на јуни уапсија четворица мажи поврзани со убиството на 25-годишниот мажјак, кој бил водач на чопорот и многу популарен кај туристите.
Мажјакот по име Рафики беше убиен во Националниот парк Бвинди.
Тоа е парк под заштита на УНЕСКО кој се наоѓа во близина на границата со Конго, на чија територија има прашума која се протега на 320 квадратни километри. Овој национален парк е дом на мајмуни, слонови, антилопи и други диви животни.
Туристите најмногу го посетуваат поради популацијата од околу 400 планински горили кои ја населуваат областа. Околу половина од светската популација на горили живее токму во Бвинди.
