Носителот на изборна единица 3, Игор Јанушев денес оствари посета во општина Лозово каде што посочи дека ВМРО-ДПМНЕ ќе се залага преку своите советници да бара од општината организирање на референдум каде што граѓаните ќе се изјаснат по однос на ова прашање за изградба на кафилерија.
„Она што предизвикува огромен проблем и што буквално од секој овде човек во Лозово го слушнав е планот на градоначалникот на општина Лозово е да изгради кафилерија. Токму на ова место каде што се наоѓаме денес е предвидена изградбата на кафилеријата. Она што особено зачудува и изненадува е буквално насилничкиот начин кој што и овде во Лозово, ова мало место се обидува градоначалникот да го направи. Имено без никаква одлука на Советот на Општината, буквално по негова сопствена волја е предвидена изградба на кафилерија, која што е во непосредна близина на куќите во кои што луѓето живеат овде, на не цели 200 метри до црквата и основното училиште“, појасни Јанушев.
Јанушев додаде дека ВМРО-ДПМНЕ како предводници на новата влада најостро се спротивставува на ваквиот план и ќе ги преземе буквално сите чекори и сите мерки кои што може за да се запре овој чин на градоначалникот.
„Зошто е ова толку битно за граѓаните на Општина Лозово? Бидејќи се загрозува здравјето и животот на луѓето. Бидејќи со изградба на еден ваков капацитет во непосредна близина на објектите како што е училиштето, се загрозува здравјето на децата. Уште еднаш еден апел до градоначалникот да престане со овој начин на делување, видовме еднаш што направи изминатиот период. Имавме една случка кога заменик министерката на информатичко општество не и беше дозволено овде да дојде во локалните канцеларии. Насилничкото однесување мора да престане“, нагласи Јанушев.
Јанушев посочи дека ОК на ВМРО-ДПМНЕ Лозово преку својата советничка група ќе бара од општината организирање на референдум каде што граѓаните на Лозово ќе се изјаснат по однос на ова прашање.
„За десетина дена од денеска веќе нема да бидат власт во Република Македонија. Но вакви насилнички работи мора веднаш да престанат. ВМРО-ДПМНЕ е тука. ВМРО-ДПМНЕ секогаш ги штити интересите на граѓаните, впрочем и тоа што го предвидуваме со програмата е буквално секој еден граѓанин да живее подобро и да има повеќе за секој еден. Уште еднаш би сакал за Лозово како земјоделски крај да потенцирам се она што сакаме и планираме да го направиме за земјоделците. 640 милиони евра за четири години субвенции или по 160 милиони евра за секоја година. Но она што е најбитно за секој земјоделец навремена исплата за субвенциите за секој да може да ја планира својата иднина“, рече Јанушев.
Текстот (Видео) Јанушев од Лозово: ВМРО-ДПМНЕ ќе бара организирање на референдум за изградба на кафилерија е превземен од МАКФАКС.
