Гевгелија,29 јуни 2020(МИА) – По точно три месеци откако во Гевгелија беше регистриран првиот заболен од корона вирусот, до денеска на подрачјето на општината заболеле вкупно 10 лица од Ковид-19, што значи дека сме успеале успешно да ја контролираме пандемијата, што беше констатирано и од министерот за здравство Венко Филипче, изјави денеска епидемиологот Сашко Олумчев.
– Нашата општина како погранично место,каде што циркулираат лица од различни земји и мигранти во ПТЦ „Винојуг“ до сега мошне успешно ја менаџираше кризата со корона вирусот. Од заболените, седум лица оздравеа, а тројцата се во фаза на тестирање и очекувам и тие да се негативизираат, нагласи Олумчев.
Ги повика гевгеличани доследно да ги применуваат мерките за заштита од ширење како и досега, со цел да се одржи и понатаму стабилна епидемиолошката состојба во општината, особено сега, кога се отворија и граничните рампи.
Во гевгелискиот Центар за јавно здравје се направени 500 тестирања во кои влегуваат и оние од скринингот на вработените во градинките и пограничната полиција.
Олумчев смета дека повторното зголемување на бројот на инфицирани лица во земјава е резултат на прераното олабавување на рестриктивните мерки, но и на неподготвеноста и потценувањето од некои што сметаа дека се работи за обичен грип.
– Апелирам до гевгеличани да не го спуштиме гардот во ниту еден момент од причина што вирусот во летниот период може да претставува голема опасност поради зголемениот проток на луѓе и туристи низ општината, рече Олумчев кој очекува дека ќе има трансфери на вирусот во контролирана, а не хаотична бројка. им/нд/
