Велес, 26 јуни 2020 (МИА) – За една година треба да се реконструира Официерскиот дом во Велес. Ова е предвидено со Договорот за јавно – приватно партнерство што го потпишаа Општината и Друштвото за проузводство, трговија и услуги „Нексус Компани” ДООЕЛ.
Како што информираат од Општина Велес, рокот на Договорот потпишан неделава е 20 години, а предвидува реконструкција, ревитализација, оперирање, управување и одржување на поранешниот Офицерски дом.
Годишниот концесиски надоместок е 5,44 милиони денари или 88.200 евра без ДДВ, што е пoстигнат на јавното наддавање одржано на 19 февруари 2020 година.
Во првите пет години приватниот партнер е ослободен од плаќање годишниот концесиски надоместок.
-Очекуваме дека за помалку од една година, Офицерскиот дом, некогашното култно место на генерации велешани, во ново руво и со многу содржини повторно ќе биде омилено место за голем број гости од Велес, од регионот и од земјата, потенцираат од Општина Велес. ад/мч/
