Битола, 29 мај 2020 (МИА) – Битолската Зоолошка градина од денеска е отворена за посетители. Начинот на работењето е регулиран врз основа на насоките и протоколот препорачан од Европската асоцијација на Зоолошки градини – ЕАЗА.
Протоколот е усогласен со претставниците на Зоолошки градини од 21 држава, и тој строго ќе се почитува, информираат од ЈОУ Зоолошка Градина – Битола.
-На секој посетител ќе му посакаме добредојде и ќе посочиме дека задолжително е почитувањето на мерките кои го ограничуваат бројот на посетители односно максимум 150 посетители на површина од еден хектар или еден посетител на површина од 10 кавдратни метри, ќе се користи е-карта за да нема примо-предавање на хартиени влезни карти, ќе се почитува физичка дистанца меѓу посетителите, а вработените ќе потсетуваат на таа обврска на посетителите, посочуваат од битолската Зоолошка Градина.
Примената на социјална дистанца меѓу луѓето и животните ќе се применува исто како и социјалната дистанца меѓу луѓето, предупредуваат од ЕАЗА.
-И оваа мерка целосно ќе се почитува без разлика на љубопитноста на секој посетител и желбата да биде што поблиску до некој кафез и да набљудува животни, а во битолската Зоолошка градина веќе се сместени нови кенгури, елени и други миленици на најмладите, информираа од менаџментот на таа општинска установа.мт/бт/
