534 полициски службеници биле ангажирани во активностите за гаснење и превенирање на пожарите во текот на изминатото деноноќие, на територијата на државата во периодот од 07.00 часот на 23.08.2021 до 07.00 часот денеска 24.08.2021, притоа биле реализирани 204 мото-патроли и користени 162 моторни возила. На терен се и припадниците на сите специјални единици на полицијата, соопшти МВР.
Полицијата апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не се фрлаат неизгаснати догорчиња и да не оставаат стаклени шишиња или други предмети, кои подолго време изложени на сонце, можат да предизвикаат пожар. Неопходна е континуирана будност и целосно одговорно однесување на секој поединец, апелираат надлежните.
