Актуелните шампиони Милвоки Бакс ги декласираа Голден стејт Вориорс во НБА лигата. Ноќта ја обележаа поразот на Бруклин Нетс, 11.последовна победа на Мемфис Гризлис и убедливите триумфи на Њу Орлеанс Пеликанс и Денвер Нагетс.
Милвоки за едно полувреме го декласираа тимот на Голден стејт. Јанис и екипата, првиот дел го добија со неверојатни 77:38. Гркот го предводеше тимот со третиот трипл-дабл во сезоната (30 поени, 12 скока, 11 асистенции). 20+ поени постигнаа Крис Мидлтон (23 поени, пет скока, седум асистенции) и Боби Портис (20 поени, седум скока).
Кај Вориорс најефикасен беше Ендру Вигинс со 16 поени.
Мемфис славеа во дуелот со Минесота 116:108. Гризлис се во најдобра форма од сите тимови во лигата. Против Минесота ја запишаа 11.последовна победа. Дезмонд Бејн со 21 и Џарен Џексон јуниор со 20 поени ги предводеа Гризлите.
Ентони Едвардс со 30 и Дианџело Расел со 29 поени беа најефикасните играчи на Минесота.
Бруклин против Оклахома го забележаа шестиот пораз на последните девет натпревари. Оклахома убедливо ги победи Бруклин со 130:109.
Блескаше Шеј Гилџус-Александер со 33 поени, 10 скока и девет асистенции. Нетс ги предводеше Џејмс Харден со 26 поени.
Уште еден тим славеше убедлив триумф. Денвер со 140:108 го победија Портланд. Вил Бартон постигна 21 поен, а Никола Јокиќ 20 поени на кои придодаде осум скока, седум асистенции и две блокади.
> Јанис и екипата ги растурија Вориорс, не запира серијата на Мемфис, убедлив пораз на Бруклин <
