Штип, 11 февруари 2020 (МИА) – Штип ќе набави уште едно пајак возило најави градоначалникот на Општина Штип, Благој Бочварски. Набавката на возилото ќе биде по изборите.
-Еве создаваме паркинг места, но даваме и за право да ставаме ред во сообраќајот. Се поставуваат и столбчиња, со што се гарантира безбедно движење и на пешаците по тротоарите, а не тие да бидат паркинг простор. Токму и тоа е вистинската грижа и така ќе работиме со цел решавање на вистинските проблеми на нашите граѓани, изјави Бочварски.
Тој истакна дека очекуваат од Бирото за рамномерен регионален развој да се распишат и тендерските постапки за регионалните проекти, а Општина Штип има добиено проект за изградба на уште една платформа за паркирање на возила кај Здравствениот дом „Панче Караѓозов“. Оваа платформа ќе чини 18 милиони денари, од кои половина од средствата се обезбедуваат од Бирото за рамномерен регионален развој, а останата половина ќе се обезбеди од буџетот на Општина Штип.
Во моментов штипското Јавно претпријатие „Стипион“ функционира со едно пајак возило, кое веќе става ред во паркирањето низ централното градско подрачје и тесните улички. вдј/вј/
