Скопје, 18 март 2020 (МИА) – Црвениот крст на Град Скопје и „Едукативниот центар за пчеларство и овоштарство“ ЦИПО организираат заедничка акција за а донирање на природен мед како лек за зајакнување на имунитетот на луѓето, што започнува од денеска.
За таа цел организаторите ги повикуваат сите пчелари и производители на мед да се вклучат во акцијата.
– Секој пчелар кој сака може да донира една или повеќе тегли сопствен природен мед. Акцијата започнува на ден 18.03.2020 година од 8 до 14 часот и ќе трае до 25 март до 14 часот. Доколку има потреба акцијата ќе продолжи, наведуваат организаторите.
Пчеларите и производителите на мед своите донации ќе може да ги доставуваат во Црвениот крст на град Скопје, односно во дневниот центар за стари лица во зградата на „Даре Џамбаз“, по што волонтерите и вработените на Црвениот крст ќе го распределуваат медот на оние на кои им е најпотребен.
