Кичево, 18март 2020 (МИА) – Црвениот крст на Република Северна Македонија- Општинска организација Кичево, од денеска почнува со реализација на активност наменета за обезбедување логистичка поддршка на ранливи целни групи на територија на градот Кичево. Во функција ќе бидат ставени два мобилни тимови кои ќе ги опслужуваат ранливте категории на граѓани на општина Кичево.
– Мобилните тимови ќе функционираат секој работен ден, од 08.30 до 12.30 часот, а нивната задача ќе биде да извршат неопходна набавка на лекови, прехранбени производи и средства за лична хигиена и истите да ги достават до домовите на старите, изнемоштени лица кои живеат сами, хронично болните лица, до семејства со лица со посебни потреби, самохрани родители кои живеат во Кичево објасни Ивана Лазеска од Црвениот крст во Кичево.
Целта на оваа активност е да им се овозможи поддршка на лицата на кои им е најнеопходна, со што тие нема да имаат потреба да ги напуштаат своите домови и на тој начин да се намали ризикот од инфицирање со вирусот Ковид-19.
Сервисната услуга што ќе ја обезбедуваат мобилните тимови ќе биде бесплатна, а граѓаните ќе одвојат финансиски средства само за артиклите или лековите кои ќе треба да им се набават.
– За повикување на мобилните тимови граѓаните ќе можат да ги користат следните телефонски броеви: 045/225-324 и 070/223-688, додаде Лазеска.рз/см/
