Поради зголемениот број на барања за тестирање на коронавирус во Хрватска, резултатите се чекаат по три дена, а пред некое време за тоа беа потребни само 24 часа.
Само во последната недела, повеќе од 1.600 лица во Хрватска се заразени со коронавирус, а епидемиологот Бранко Колариќ, член на владиниот совет, посочува дека системот е веќе преоптоварен.
„Системот е преоптоварен. Имаме зголемена побарувачка за тестирање, а тоа не е добро. Јас не сум среќен што дојде до оваа ситуација и се надевам дека ќе ги зголемиме нашите капацитети за тестирање”, рече Колариќ за телевизијата РТЛ.
Според податоците, во последните 14 дена процентот на позитивни во однос на тестираните е поголем од 11 проценти, а Светската здравствена организација вели дека ако е повеќе од пет проценти, тоа значи дека земјата не ја држи епидемија под контрола.
„Во последните 14 дена навистина имаме зголемен број на заразени лица и не сме задоволни од епидемиолошките индикатори. Сега сме изложени на голем ризик дека работите би можеле да излезат од контрола ако повторно не направиме сè: доволно тестирања, изолација на позитивните и самоизолација на нивните контакти, физичко растојание“, објасни Колариќ.
Онаму каде што тоа не е можно, треба да биде задолжително носењето на маски, рече тој.
Иако досега нема толку многу болнички случаи, Колариќ вели дека болниците, со оглед на ова забрзување на епидемијата, би можеле повторно да се наполнат.
