Во екот на предвремените парламeнтарни избори, од Асоцијацијата за здравствена едукација и истражување, ХЕРА, апелираат до сите кандидати и кандидатки од политичките партии, да користат јасни недвосмислени пораки и точни информации кога станува збор за сеопфатното сексуално образование (ССО).
„Имајќи ја предвид важноста на сеопфатното сексуално образование, но и одговорноста и обврските што произлегуваат од секој јавно кажан збор, го поздравуваме обидот да се актуелизира ССО како тема во јавноста, но апелираме до сите носители и кандидати за јавни функции своите ставови и мислења да ги засноваат на научно докажани факти и сознанија и да консултираат стручна и релеватна литература, како и граѓански организации кои долго време работат на оваа тема“, се наведува во соопштението во кое се додава дека кога веќе кандидатите јавно го препознаваат ССО како важно, да се заложат за негово воведување како изборен предмет во основното и средното образование.
Од ХЕРА појаснуваат дека сеопфатното сексуално образование ги вклучува сите културолошки, психо-социјални и емоционални аспекти на сексуалноста, вклучително и задоволството и сексуалната различност, кои претставуваат основа за развој на здрава и толерантна млада личност.
Преку него, велат од Асоцијацијата, младите се запознаваат со темите како род, врски и односи, тело и слика за телото, сексуално и репродуктивно здравје (ХИВ, сексуално преносливи инфекции, контрацепција), сексуалност и сексуално однесување, насилство и граѓански аспекти.
Текстот ХЕРА со апел до изборните кандидати да користат точни информации за сексуалното образование е превземен од МАКФАКС.
