Лидерите на ЕУ почнаа да пристигнуваат во Версајската палата во Париз на самит на кој ќе се разговара за тоа како да се намали зависностa од руската енергија и како да се зајакне политичката и моралната поддршка за Украина.
Претседателката на Европската комисија Урсула фон дер Лајен изјави за новинарите дека војната на Путин е одлучувачки момент за Европа.
„На овој самит ќе ја преиспитаме европската одбрана. Ќе ја преиспитаме енергијата. Треба да се ослободиме од нашата зависност од руските фосилни горива, а за тоа ни се потребни големи инвестиции во обновливите извори на енергија. Ова е исто така стратешка инвестиција во нашата безбедност и независност“, додаде таа.
„Ние, исто така, сигурно ќе зборуваме за Украина како дел од нашето европско семејство. Сакаме слободна и демократска Украина со која делиме заедничка судбина“, рече претседателката на Европската комисија.
