Скопје, 13 март 2020 (МИА) – Радикалните мерки ги преземавме откако видовме дека тие дадоа резултати во Кина и Италија, таму каде што се жариштата. Мерките се сериозни и мора задолжително да се почитуваат. Против секој што не ги почитува ќе бидат преземени соодветни мерки, истакна денеска министерот за здравство Венко Филипче.
– Ние не можеме да знаеме и да бидеме сигурни со која динамика и како ќе се шири вирусот посебно што имаме различни сценарија. Имаме 12 луѓе кои биле со пациентката повеќе од 20 часа во еден мал минибус и никој не заболел. Имаме друго сценарио при кое со контакти непосредни после тоа се пренела болеста. Така што очекувања, предвидувања, апсолутно неблагодарно е да се дадат, рече Филипче одговарајќи на новинарско прашање по прес-конференцијата во Владата. рп/са/
